00 ศิลปะล้านนา | Lannacultural

 เจ้าละอองคำ : น้องเกยได้ยินมาเมินละ ว่าเจียงเงินบ้านเจ้าปี้งามขะหนาด น้องไค่หันเจ้าว่าจะงามมอกใดก่อเลยไค่ไปแอ่วเจียงเงิน เจ้าปี้ปาน้องไปได้ก่อเจ้า

เจ้าแม้นเมือง : บ่าได้หรอกละอองคำ บ้านปี้ไก๋ เดินตางก่อลำบาก

เจ้าละอองคำ : น้องไค่ไปแต๊นะเจ้า

เจ้าแม้นเมือง : ถ้าจะอั้น วันนี้หื้อน้องไปวัดต้นเกว๋นตวยปี้ น้องก่อจะได้หันเจียงเงินบ้านของปี้

เจ้าละอองคำ : วัดนะเจ้า จะเหมือนบ้านเจ้าปี้ได้จะใด

เจ้าแม้นเมือง : ก่อเพราะวัดนี้มีวิหาร กับศาลาเหมือนตี้บ้านปี้ เปิ้นฮ้องศาลาจัตุรมุข เป๋นการแป๋งแบบ ล้านนาแต๊ๆ หาผ่อตี้ไหนบ่าได้ละเน้อ ตั๋ววิหารก่อตวย เป๋นอาคารไม้ก่ออิฐถือปู๋น

เจ้าละอองคำ : วัดนี้เปิ้นแป๋งมาเมินละก๋าเจ้า

เจ้าแม้นเมือง : แป๋งตั้งแต่สมัยพระเจ้ากาวิโลสุริยวงศ์ เป๋นเจ้าหลวงเจียงใหม่ ก่อประมาณ 149ปี๋มาแล้ว

เจ้าละอองคำ : ยิหยังเปิ้นฮ้องว่าวัดต้นเกว๋นหล่ะเจ้า น้องงืดขะหนาด

เจ้าแม้นเมือง : สมัยตี้เปิ้นมาผ่อตี้แป๋งวัด มันมีต้นบ่ะเกว๋นขึ้นอยู่ ก่อเลยฮ้องว่าวัดต้นเกว๋น  กำนี้เปิ้นว่ามันบ่อเป๋นทางก๋าน ก่อเลยฮ้องจื้อใหม่ว่า วัดอินทราวาส สมัยตะก่อนวัดนี้เกยเป๋นตี้พักของขบวนเจินพระธาตุศรีจ๋อมตองมาตี้เจียงใหม่ต๋ามธรรมเนียมบ่เก่าของเจ้าหลวง จะพักขบวนเพื่อหื้อจาวบ้านได้มาปูจา สรงน้ำพระ ขอโจ้กขอจัยกั๋นพอวันพระตุ๊เจ้าจะตีก๋องปูจา เป๋นก๋องหนังใหญ่ขะหนาดเน้อ

เจ้าละอองคำ : งามแต๊ๆ อย่างตี้เจ้าปี้ว่าเลยเจ้า ยินดีจั๊ดนักตี้ปาน้องมาแอ่วตวย

เขียนจันทร์ :อ้ายอินทรเจ้า เจียงใหม่นี่มีตี้ใตก่อเจ้า ตี้มีดอกไม้งามๆ หื้อผ่อนักๆ ข้าเจ้าไค่อยากถ่ายฮูปหน่ะเจ้า

อินทร : ต้องตี้นี่เลย อุทยานหลวงราชพฤกษ์ น่าดีไปขะหนาดเน้อ มีพรรณไม้เมืองเหนืองามๆจากโครงก๋านหลวง ตี้ก่อกว้างจ๊ดหูจ๊ดต๋า เตวปอบ่าค่อย แต่ดีตี้เปิ้นมีรถฮางหื้อนั่งจมสวนแวะไปเป๋นตี้เป๋นตี้ ไค่ลงเมื่อใดก่อลงต๋ามใจ๋ ก่ะว่าจะปั่นรถถีบก่อได้ เปิ้นก่อมีหื้อ

เขียนจันทร์ : ฟังอ้ายอู้มา สีท่าจะงามขะหนาดเนาะ

อินทร : งามก่ะ แต่บ่อมีต้นจมปูป่าหื้อผ่อเน้อ ต้นนี้มีตี้เจียงเงินตี้เดียว บ่าดีลืมไปหอคำหลวงตวยเน้อแบบเปิ้นเอามาจากวิหารวัดต้นเกว๋น ง๊ามงาม ละก่อใหญ่ขะหนาดจะบอกหื้อ

เขียนจันทร์ : จะอั้นต้องฟั่งยะก๋านหื้อแล้ว ละไปผ่อกับต๋าตั๋วเก่าละ

อินทร : ถ้าจะไปก็ไปเจ๊าๆเน้อ บ่าดีไปขวาย แดดมันจะฮ้อน ละเฒ่าแล้วก่อนั่งรถเอาเน้อ บ่าดีเตวจะเป๋นลมเป๋นแล้งไปเหียก่อน

เขียนจันทร์ : โฮ๊ะ อ้ายนี่จะใด มาว่าเปิ้นเฒ่า ก่ะเดียวก่อนเต๊อะ